Kryetari i komunës së Mitrovicës, Avni Kastrati, ka pritur të premten në takim drejtorin e Përgjithshëm të Policisë së Kosovës, Sheremet Ahmeti, me të cilin ka biseduar për mundësinë e gjetjes së një zgjidhje për sistemimin e personelit të stacionit jugor të policisë, pasi objekti që kanë shfrytëzuar deri me tani është dëmtuar nga tërmeti.
Rrjeti i organizatave joqeveritare “Demokracia në Veprim”, ka përcjell fushatën një-javore parazgjedhore në Gjilan, me ç’rast vlerëson se përkundër një fushate të qetë, ka pasur edhe raste të përdorimit të një gjuhë të ashpër politike dhe fyese e kandidatëve në garë për Gjilanin.
Në emër të institucioneve dhe popullit të Kosovës, presidenti i Fatmir Sejdiu i ka dërguar një telegram ngushëllimi familjes Sheholli, e cila humbi më të dashurin e saj, etnomuzikologun e dalluar, Bahtir Sheholli, punëtor shumëvjeçar i Institutit Albanologjik të Prishtinës dhe studiues i dalluar i etnomuzikologjisë dhe trashëgimisë sonë muzikore.
Departamenti amerikan i Shtetit në raportin vjetor për gjendjen e të drejtave të njeriut thekson se korrupsioni, ndërhyrja e qeverisë në forcat e rendit e sigurisë dhe në gjyqësor, mbeten ndër problemet kryesore në Kosovë. Raporti nënvizon se ka rënie të dhunës ndëretnike, por problem mbeten strukturat paralele të Serbisë.
Aleanca Kosova e Re, ka shprehur shqetësimin e saj lidhur me kërcënimet e vazhdueshme ndaj gazetarëve, veçanërisht ndaj atyre hulumtues. Rastet e shumta të kërcënimeve ndaj gazetarëve dhe tendenca e vazhdueshme për të kontrolluar median e shkruar dhe atë elektronike në Kosovë, sipas AKR-së, e nxjerrë Kosovën si një ndër vendet me nivel të ulët të lirisë së shtypit.
Në radhët e Aleancës për Ardhmërinë e Kosovës të enjten ka aderuar zyrtarisht veprimtari dhe atdhetari i shquar Hysen Gërvalla, i cili në vitet e fundit ishte pjesë e LDK-së dhe më vonë e LDD-së.
Në Kosovë nuk do të ketë termet me pasoja katastrofike i ka thënë Radio Dukagjinit, Slavica Radovanovic, drejtoreshë e Institutit Sizmologjik të Republikës së Serbisë e cila ditë më parë kishte paralajmëruar se në Rrafshin e Dukagjinit po akumulohet energji sizmike.
Kryetari i Kuvendit, Jakup Krasniqi, priti të mërkurën në një takim delegacionin e Këshillit kundër procesit gjyqësor ndaj Albin Kurtit, në përbërje të të cilit ishin: Valon Murati, Igballe Rogova, Arjeta Rexhaj dhe Nehat Bllacaku. Me këtë rast ata i dorëzuan kryekuvendarit Krasniqi kërkesën për mbylljen e procesit gjyqësor ndaj Albin Kurtit dhe fillimin e hetimeve për vrasjet e 10 shkurtit të vitit 2007.
